20150607 #毒檸時間
[香港之《少年JUMP》不可能性]
嚟緊爆漫王將推出真人版電影，搵嚟佐滕健同神木隆之介做主角，雖然之前睇過Spec同浪客劍心都知兩位演技都得挑剔，但係要26扮16似乎都係有啲勉強。不過爆漫王漫畫本身出色，應該都OK嘅~
講起爆漫王哩套漫畫，講兩個中學生好想畫漫畫，於是合作，一個係編劇，一個係畫家，合作創作，投稿去一本日本最主流嘅漫畫週刊，叫少年JUMP。希望可以出人頭地嗰啲啦~裡面有一樣嘢我好在意嘅，就係佢地個故事講咗好多漫畫界嘅潛規則嘅，當中最容易比人記得嘅~應該就係佢地其中一句金句，友情 + 努力 + 勝利！亦係少年JUMP人氣故事嘅黃金法則，火影龍珠One Piece都係咁~由唔係好勁，同啲朋友一齊努力~去修練，最後得到勝利。嗱哩套公式，聽落就好鬼獅子山精神啦~我地大家用艱辛努力寫下那不朽香江名句~就係哩個公式囉~之但係，哩套公式又可唔可以套用喺香港呢？
前面兩句都得嘅~啫係~友情+努力~都buy嘅，但係有咗哩兩樣嘢係咪就可以勝利呢？似乎又唔係囉~友情+努力：一大班人一齊去修練~坐太空船去咗一個新嘅地方，學習新技能，最後回到地球，咪都係繼續跑數囉。獅子山精神，發展到今時今日，其實都幾病態，友情+努力+友情+努力+友情+努力~加極，都好似未有等於咁，換嚟嘅，可能只係一句「香港係上一代捱好耐捱返嚟嘅~」。所以香港唔可以有少年JUMP，我地只可以有中年JUMP或老年JUMP，一日佢地KEEP住DUMP 500蚊出嚟叫人砌條片，仲一路講「洗幾難」，我諗我地想勝利，都幾難。
如果真係有種精神，叫獅子山精神，我諗都應該有種病，叫獅子山精神病。暫時都未有咩藥可以醫到患者~我諗佢地都要一大班人，一齊搵架太空船出去闖下，沿路經過一啲星球睇下搵唔搵到神醫啦~又或者唔太需要搵太空船，如果你本身都夠離地嘅話。
誠意介紹比離地太空人睇嘅中套作品吖~爆漫王，你地應該可以喺入面搵到啲共鳴架：「友情 + 努力 = 勝利！」、「節儉 + 努力 = 買到樓！」。
#爆漫王 #bakuman #少年Jump #黃金法則
Search